पद्माताई भोसले यांचा वाढदिवस विविध उपक्रमाने साजरा

पद्माताई भोसले यांचा वाढदिवस विविध उपक्रमाने साजरा

इंदापूर प्रतिनिधी शिवाजी पवार

 दि.१८ मार्च – शंकरराव पाटील चॅरिटेबल ट्रस्टच्या अध्यक्षा श्रीमती. पद्माताई भोसले यांच्या वाढदिवसानिमित्त ट्रस्टतर्फे सामाजिक जाणीवेचे दर्शन घडवणारे उपक्रम राबविण्यात आले. संस्थेच्या कार्यालयाच्या परिसरात वृक्षारोपण करण्यात आले, तर श्रावणबाळ अनाथाश्रम येथे विद्यार्थ्यांना खाऊचे व विविध विषयांवर मार्गदर्शन करणाऱ्या पुस्तकांचे वाटप करून ज्ञानदानाचा महत्त्वपूर्ण संदेश देण्यात आला.

          श्रीमती पद्माताई भोसले यांचे सामाजिक कार्य हे प्रेरणादायी आहे. महिलांचे सक्षमीकरण, ग्रामीण भागातील आरोग्यसेवा, मुलांसाठी शिक्षण क्षेत्रातील उपक्रम आणि अनेक सामाजिक विषयांवर सातत्याने काम करणाऱ्या त्यांच्या नेतृत्वाचा आज समाजावर मोठा प्रभाव पडलेला आहे. त्यांच्या वाढदिवसानिमित्त पर्यावरण रक्षणाचा संदेश देणारे वृक्षारोपण आणि मुलांमध्ये वाचन संस्कृती जोपासणारे ग्रंथवाटप असे दोन अत्यंत विधायक उपक्रम राबवले गेले.

          शंकरराव पाटील चॅरिटेबल ट्रस्टच्या प्रांगणात विविध प्रकारची झाडे लावण्यात आली. “प्रत्येक झाड हे भविष्यातील श्वासाचे बीज आहे,” अशा भावनेतून स्वयंसेवक, विद्यार्थी आणि ट्रस्टच्या सदस्यांनी यामध्ये सहभाग घेतला. त्यानंतर श्रावणबाळ अनाथाश्रम येथे जाऊन विद्यार्थ्यांना शैक्षणिक व प्रेरणादायी पुस्तकांचे वाटप करण्यात आले. मुलांच्या चेहऱ्यावर उमटलेले आनंदाचे हास्य आणि त्यांची वाचनाविषयीची उत्सुकता पाहून उपस्थितांचे मन भरून आले. हा उपक्रम म्हणजे फक्त पुस्तक वाटप नव्हे, तर त्यांना उज्वल भवितव्यासाठी एक छोटासा मार्गदर्शनाचा दीप देण्याचा प्रयत्न होता.

          या दोन्ही उपक्रमांच्या माध्यमातून श्रीमती पद्माताई भोसले यांच्या कार्याची सामाजिक जाणीव अधोरेखित झाली. वाढदिवसाच्या दिवशी केवळ सेलेब्रेशन न करता, समाजासाठी काहीतरी चांगले करण्याचा घेतलेला संकल्प हा खर्‍या अर्थाने प्रेरणादायी ठरला आहे. भविष्यात अशा उपक्रमांची व्याप्ती वाढत राहो, हीच सर्व स्तरातून भावना व्यक्त करण्यात आली.

          या कार्यक्रमासाठी संस्थेचे विश्वस्त श्री.अरविंद गारटकर, आरोग्य केंद्र प्रमुख श्री.महादेव चव्हाण, कोपिवरची शाळा प्रमुख श्री.भारत बोराटे, मार्गदर्शक हमीदभाई अत्तार, श्रावणबाळ अनाथ आश्रमाचे प्रमुख ह.भ.प.राजीव करडे महाराज, सागर कांबळे, अमोल राऊत, केदार गोसावी संस्थेचे ॲडमीन श्री.दिपक जगताप व संस्थेचे सर्व कर्मचारी उपस्थित होते.